Reglugerð Háskólans á Bifröst

Samþykkt á stjórnarfundi 6. september 2011

1. KAFLI  -   STJÓRNSKIPULAG

 
1. gr.

Háskólinn á Bifröst er sjálfseignarstofnun sem starfar á grundvelli samþykkta stjórnar skólans. Háskólinn starfar í samræmi við háskólalög og reglur um viðurkenningu menntamálaráðherra. b. 2. gr.

2. gr.

Stjórn háskólans ber ábyrgð á rekstri, fjárhag og eignum hans. Stjórn háskólans skal standa vörð um tilgang og hlutverk hans samkvæmt samþykktum og skal ávallt virða faglegt akademískt sjálfstæði háskólans. Stjórnin ræður rektor til starfa og leysir frá störfum. Formaður stjórnar háskólans semur fyrir hönd hennar við rektor um starfskjör.

3. gr.

Rektor annast stjórnun og rekstur háskólans í umboði stjórnar og ber ábyrgð gagnvart henni. Hann ber ábyrgð á að starfstilhögun öll sé í samræmi við hlutverk, markmið og gæðakröfur skólans. Rektor ræður starfsmenn og leysir þá frá störfum. Rektor ábyrgist öll fjármál háskólans í umboði stjórnar. Hann skal leggja fjárhags- og rekstraráætlun fyrir næsta reikningsár fyrir stjórn háskólans eigi síðar en 15. desember ár hvert.

Rektor kemur fram fyrir hönd háskólans út á við og hefur forgöngu um þróunarstarf og stefnumótun.
Rektor er yfirmaður gæðamála.

Rektor stýrir daglegum rekstri skólans, en skal ráðfæra sig við stjórnarformann á milli funda stjórnar háskólans um allar stefnumarkandi eða óvenjulegar ákvarðanir. Slíkar ákvarðanir skulu bornar undir stjórn eins skjótt og verða má.

4. gr.

Aðstoðarrektor stýrir akademískri starfsemi skólans, bæði kennslu og rannsóknum. Hann ber ábyrgð á gæðum náms, kennslu og rannsókna gagnvart rektor og háskólaráði. Hann  er staðgengill rektors í fjarveru hans.

5. gr.

Háskólaráð er æðsta vald í innri málum háskólasamfélagsins. Þar sitja rektor, aðstoðarrektor, framkvæmdastjóri kennslu og þjónustu,  þrír fulltrúar kennara sem kennslu- og rannsóknarráð tilnefnir, einn fulltrúi annarra starfsmanna háskólans sem tilnefndur er á starfsmannafundi,  þrír nemendur úr grunnnámi, einn fulltrúi nemenda frumgreinadeildar og einn fulltrúi meistaranema. Fulltrúar nemenda eru kjörnir af

nemendum. Fyrir hvern kjörinn fulltrúa skal kjörinn varafulltrúi. Framkvæmdastjóri rekstrar og fjármála og fulltrúi hagsmunasamtaka íbúa eru með seturétt í háskólaráði með málfrelsi og tillögurétt en án atkvæðisréttar. 

                                                                                                                                                                 
Háskólaráð ákvarðar um:

1) Stefnumörkun háskólans á sviði kennslu og rannsókna í samráði við kennslu- og rannsóknarráð.
2) Sameiginlega kennslufræði háskólans.
3) Gæðamál.
4) Málefni er varða samskipti innan háskólasvæðisins almennt eða háskólasamfélagið sem heild.
5) Kærur vegna úrskurða fagráðs.
6) Úrskurði og álit siðanefndar og viðurlög vegna brota á siðareglum.

7) Framkvæmd háskólareglna og viðurlög við brotum á þeim.
8) Kjör heiðursdoktora, en að tillögu háskólaráðs getur stjórn veitt einstaklingi nafnbót heiðursdoktors við Háskólann á Bifröst.

Háskólaráð er einnig umræðu- og ákvarðanatökuvettvangur um önnur málefni háskólasamfélagsins.

Fundir ráðsins eru lögmætir ef meirihluti þeirra sem rétt eiga til fundarsetu sækir fund, en fundi skal boða með sólarhrings fyrirvara hið minnsta. Einfaldur meirihluti atkvæða ræður ákvörðunum en atkvæði rektors er oddaatkvæði, falli atkvæði jafnt. 

Skylt er að boða fund í háskólaráði ef þriðjungur þeirra sem seturétt eiga í ráðinu óska þess.

Fundargerðir háskólaráðs skal birta á vef skólans.

6. gr.

Háskólanám við Háskólann á Bifröst er á viðskipta-, lögfræði- og félagsvísindasviði. Jafnframt er við skólann starfrækt frumgreinadeild fyrir nemendur sem ekki uppfylla lágmarksskilyrði inn í háskólanámið og símenntun þar sem kenndar eru styttri námsleiðir sem tengjast atvinnulífinu.  Sviðsstjórar leiða stefnumörkun fyrir fræðasvið og stýra faglegum málefnum þeirra.

Fagráð háskólans er skipað aðstoðarrektor, sviðsstjórum og einum fulltrúa háskólanema sem nemendur kjósa og skulu þeir jafnframt kjósa einn til vara.  Fagráð vinnur að akademískri stefnumótun og þróun skólans og gerir tillögur til háskólaráðs þar um. Fagráð ákveður jafnframt um innihald námsbrauta og einstakra námskeiða. Fagráð ber ábyrgð á því að kennarar og annað starfsfólk framfylgi reglum skólans og uppfylli þær faglegu kröfur sem gerðar eru innan hans. 

Fagráð fjallar um umsóknir og gerir  tillögur um ráðningu fastra kennara til rektors og um ráðningu stundakennara til aðstoðarrektors. Aðstoðarrektor boðar til fagráðsfunda og stýrir þeim. Fundi skal boða með minnst sólarhrings fyrirvara og skulu fundargerðir fagráðs birtar á heimasíðu skólans.

Fagráð fjallar um vafamál varðandi inntökur, kærur varðandi námsmat, fyrirkomulag prófa eða aðra framkvæmd á reglum skólans sem ekki heyra beint undir háskólaráð.  Ákvarðanir ráðsins má kæra til háskólaráðs.

7. gr.

Framkvæmdastjórn er samráðsvettvangur rektors og stjórnenda um daglegan rekstur skólans. Í henni sitja ásamt rektor, aðstoðarrektor, sviðsstjórar, framkvæmdastjóri kennslu og þjónustu og framkvæmdastjóri rekstrar og fjármála. Framkvæmdastjórn fundar að jafnaði vikulega og fundi hennar sitja einnig aðrir starfsmenn skólans eftir ákvörðun rektors hverju sinni.

Framkvæmdastjóri kennslu og þjónustu og framkvæmdastjóri rekstrar og fjármála bera ábyrgð á gæðum þjónustu og annarrar starfsemi skólans gagnvart háskólaráði og rektor.

8. gr.

Kennslu – og  rannsóknarráð er samráðsvettvangur akademískra starfsmanna skólans. Allar stefnumótandi ákvarðanir sem lúta að kennslu og rannsóknum skal fjalla um og kynna í kennslu- og  rannsóknarráði áður en þær eru leiddar til lykta á öðrum vettvangi innan skólans.  Kennslu- og rannsóknarráð fundar að minnsta kosti fjórum sinnum á ári eða oftar eftir því sem þurfa þykir. Aðstoðarrektor boðar fundi og stýrir þeim. Fundi skal halda ef  þriðjungur þeirra sem eiga seturétt í ráðinu óska þess.

9. gr.

Háskólaráð kýs árlega á fyrsta fundi háskólaársins sérstakt gæðaráð. Í því sitja þrír fulltrúar nemenda,  kjörnir af nemendum, og þrír fulltrúar kennara, tilnefndir af kennarafundi, ásamt formanni sem tilnefndur er af rektor.  Jafnframt starfar gæðastjóri með ráðinu, skipuleggur fundi þess í samráði við formann og ritar fundargerðir þess.

Gæðaráð ásamt gæðastjóra ber ábyrgð á gæðastjórnun háskólans gagnvart rektor og háskólaráði og skal tryggja að skólinn starfi í samræmi við eigin og ytri gæðakröfur.

Gæðastjóri í samráði við gæðaráð gerir kennslumat og leggur niðurstöður þess  fyrir kennara hverju sinni, fagráð og háskólaráð til kynningar.

Gæðaráð skilar rektor og háskólaráði árlega skýrslu um störf sín og gæðamál skólans.

2. KAFLI  -  STARFSFÓLK

10. gr.

Skólinn leggur metnað sinn í að við skólann starfi hæft starfsfólk og setur sér starfsmannastefnu þar sem fjallað er um markmið og áherslur í starfsmannamálum.

Rektor ræður aðstoðarrektor, sviðsstjóra, framkvæmdastjóra og aðra stjórnendur. Rektor ræður prófessora, dósenta og lektora að fengnum tillögum fagráðs. Rektor skal gera stjórn grein fyrir slíkum ráðningum. Aðstoðarrektor ræður stundakennara að fengnum tillögum fagráðs.

11. gr.

Stjórnin skipar árlega dómnefnd til að meta hæfi umsækjenda, þar sem fagráð tilnefnir einn, stjórnin sjálf einn og menntamálaráðherra einn.

Dómnefndarmenn skulu  hafa lokið meistaraprófi úr háskóla eða jafngildu námi og skal formaður dómnefndar hafa sama eða æðra hæfi og um er fjallað, verði því við komið. Í dómnefnd skulu sitja a.m.k. tveir fulltrúar sem ekki starfa við Háskólann á Bifröst.

 Við ráðningu í stöðu lektors, dósents eða prófessors skal dómnefnd áður fjalla um hæfi umsækjanda um slíka stöðu.  Hafi viðkomandi verið metinn hæfur til að gegna sambærilegri stöðu við annan viðurkenndan háskóla, er heimilt að ráða  í stöðuna á grundvelli þess mats. Ákvörðun um ráðningu í stöðu er sjálfstæð ákvörðun rektors og veitir dómnefndarmat viðkomandi starfsmanni ekki rétt á framgangi í samræmi við matið.

Kennarar við háskólann skulu hafa sambærilega starfstitla og tíðkast við aðra íslenska háskóla. Við fastráðningu til kennslustarfa skal miðað við skilyrði 18. gr. háskólalaga nr. 63/2006. 

Dómnefndir fjalla um  rannsóknarskýrslur og leggja mat á gildi þeirra. Dómnefndir meta kennslu, rannsóknir og stjórnun á sambærilegan hátt  og gert er í öðrum háskólum.  Beiðni um framgang skal beint til aðstoðarrektors sem kemur henni á framfæri við dómnefnd.

12. gr.

 Til þess að hljóta lektorsstöðu þarf umsækjandi að fullnægja skilyrðum 18. gr. háskólalaga að mati dómnefndar.

Lektor getur  sótt um framgang í dósentsstöðu enda uppfylli hann að öðru leyti skilyrði til að gegna henni. Skal dómnefnd taka tillit til allra viðeigandi þátta í menntun og starfsreynslu umsækjanda, jafnt við Háskólann á Bifröst sem  aðra háskóla eða önnur sambærileg störf. Umsækjandi skal hafa sýnt með rannsóknum, ritstörfum, háskólakennslu eða öðrum akademískum störfum viðunandi árangur að mati dómnefndar.

Dósent skal að jafnaði hafa meira en fimm ára háskólanám að baki frá viðurkenndri innlendri eða erlendri menntastofnun eða hafa með rannsóknum, ritstörfum, háskólakennslu eða öðrum akademískum störfum sýnt jafngilda hæfni að mati dómnefndar. Þá skal og tekið tillit m.a. til annars sérstaks framhaldsnáms, námskeiða o.þ.h. sem umsækjandi hefur lokið umfram tveggja ára vísindalega þjálfun.

13. gr.

 Prófessor skal að jafnaði hafa doktorspróf eða sambærilega prófgráðu frá viðurkenndri innlendri eða erlendri menntastofnun eða hafa með rannsóknum, ritstörfum, háskólakennslu eða öðrum akademískum störfum sýnt jafngilda hæfni að mati dómnefndar. Umsækjendur um prófessorsembætti þurfa að vera vel virkir í rannsóknum og hafa sýnt verulega hæfni og frumkvæði í vísindalegum störfum. Auk rannsókna ber að taka tillit til annarra ritstarfa, háskólakennslu eða annarra akademískra starfa.

 Dósent getur farið þess á leit að hann verði fluttur í prófessorsstöðu enda uppfylli hann að öðru leyti skilyrði til að gegna henni. Skal dómnefnd taka tillit til allra viðeigandi þátta í menntun og starfsreynslu umsækjanda, jafnt við Háskólann á Bifröst sem  aðra háskóla eða önnur sambærileg störf. Umsækjandi skal hafa sýnt með rannsóknum, ritstörfum, háskólakennslu eða öðrum akademískum störfum viðunandi árangur að mati dómnefndar til þess að teljast hæfur til að gegna prófessorsembætti.

3. KAFLI – RANNSÓKNIR

14. gr.

Akademískir starfsmenn Háskólans á Bifröst njóta rannsóknafrelsis. Þeir eru einráðir um viðfangsefni sín og áherslur í rannsóknum.

Aðstoðarrektor semur við akademíska starfsmenn um hlutfall rannsókna í starfsskyldum þeirra og um lágmarksafköst í samræmi við það hlutfall.

Akademískir starfsmenn skila aðstoðarrektor fyrir 1. mars ár hvert skýrslu yfir rannsóknir sínar á liðnu ári ásamt afritum af birtu efni. Matsnefnd skólans veitir stig fyrir rannsóknir samkvæmt vinnumatskerfi skólans.

15. gr.

Rannsóknamiðstöð Háskólans er sérstök rannsókna- og ráðgjafarstofnun á vegum skólans. Hún starfar í samræmi við rannsóknastefnu skólans sem Háskólaráð setur að tillögu fagráðs.

Forstöðumaður Rannsóknamiðstöðvar ber ábyrgð á starfsemi hennar og rekstri gagnvart aðstoðarrektor og framkvæmdastjóra rekstrar og fjármála.

Rannsóknamiðstöð birtir árlega skýrslu um starfsemi sína og rannsóknasetra sem undir hana heyra.

16. gr.

Skólanum er heimilt að setja á fót rannsóknasetur á fræðasviðum skólans í því skyni að efla rannsóknir í samræmi við rannsóknarstefnu og til að auka möguleika akademískra starfsmanna á samstarfi við aðra skóla og rannsóknastofnanir.

Rektor skipar forstöðumann sem fer með faglegt forræði seturs. Heimilt er að fela sjálfstæðri stjórn slíkt forræði.

Rannsóknasetur starfa sem hluti af rannsóknamiðstöð skólans og hefur forstöðumaður hennar umsjón með rekstri þeirra.  Rannsóknarsetur

eru kostuð af sjálfsaflafé þeirra.

4. KAFLI  -   INNTÖKUSKILYRÐI OG PRÓFGRÁÐUR

17. gr.

Aðstoðarrektor ber ábyrgð á meðferð umsókna um skólavist.  Sviðsstjórar, eða aðrir sem fagráð felur það, fara yfir umsóknir og velja þá nemendur sem boðin er skólavist.  

18. gr.

Háskólinn skal ávallt leitast við að veita jöfn tækifæri til náms, óháð kynferði, efnahag, fötlun eða búsetu. Leitast skal við að velja breiðan hóp nemenda sem endurspeglar menningarlega fjölbreytni samfélagsins.

Túlkun reglugerðar háskólans skal fela í sér svigrúm í námi og próftöku vegna meðgöngu og barnsfæðinga.

Nemendur við háskólann skulu ávallt njóta réttinda skv. reglum um áfrýjunarnefnd í kærumálum háskólanema nr. 1152/2006.

19. gr. 

Til staðfestingar á skólavist skulu umsækjendur greiða sérstakt staðfestingargjald.
Fyrir nám sitt greiðir nemandi sérstakt skólagjald sem rektor ákveður hverju sinni í samráði við háskólaráð og stjórn.

20. gr.

Til að hefja nám í frumgreinadeild þarf umsækjandi að hafa lokið sem svarar 140 einingum (fein) á framhaldsskólastigi. Að jafnaði ganga þeir umsækjendur fyrir sem eru eldri en 25 ára.

Heimilt er að veita inngöngu í frumgreinadeild umsækjendum sem ekki hafa lokið tilskildum einingafjölda á framhaldsskólastigi, en hafa þess í stað starfsreynslu sem telst jafngild slíkum einingafjölda.

Nemendur sem ljúka námi í frumgreinadeild með einkunnina 7,25 eða hærra, þó ekki fleiri en þrjátíu talsins, eiga forgang að námi í háskóladeildum skólans á næsta háskólaári. Nemendur sem ljúka námi í frumgreinadeild með lakari árangri en að ofan greinir eru metnir sérstaklega ásamt öðrum umsækjendum.

21. gr.

Til inngöngu í grunnnám þarf umsækjandi að hafa lokið stúdentsprófi eða öðru sambærilegu framhaldsskólanámi.
Fagráði er heimilt að veita undanþágu frá ofangreindu ákvæði búi umsækjandi yfir reynslu og/eða þekkingu sem meta má til jafns við stúdentspróf.

22. gr.

Inntökuskilyrði í meistaranám er grunnháskólagráða (bakkalár) eða jafngildi hennar.

Fagráði er heimilt að veita undanþágu frá ofangreindu ákvæði búi umsækjandi yfir reynslu og/eða þekkingu sem meta má til jafns við grunnháskólagráðu.

23. gr. 

Einingar í frumgreinadeild eru framhaldsskólaeiningar (fein).

Frumgreinanám er 60 einingar (fein).

Einingar í háskólanámi eru veittar samkvæmt ECTS kerfi (European Credit Transfer System).
Nám til diplomagráðu skal vera 30 – 120  ECTS einingar.

Grunnnám til bakkalárgráðu við skólann er 180 ECTS einingar.

Framhaldsnám til meistaragráðu við skólann er 90 – 120 ECTS einingar.

Í grunnámi er fagráði heimilt að meta allt að 90 ECTS einingar  sem nemandi hefur lokið í öðrum háskólum eða námsleiðum auk skiptináms. Í framhaldsnámi er  fagráði heimilt að meta til eininga allt að 30 einingum úr öðrum háskólum eða námsleiðum, auk skiptináms, sem hluta af  meistaranámi við skólann.

24. gr.

 Háskólinn á Bifröst veitir eftirtaldar gráður að afloknu grunnnámi við skólann:
1) BS gráðu í viðskiptafræði

2) BS in Business Administration

3) BBA gráðu í viðskiptafræði
4) BS gráðu í viðskiptalögfræði
5) BA gráðu í heimspeki, hagfræði og stjórnmálafræði (HHS)

6) BA gráðu í alþjóðafræði

Háskólinn veitir eftirtaldar gráður að afloknu meistaranámi við skólann:
1) MS (Master of Science) gráðu í alþjóðlegum fjármálum og bankastarfsemi
2) MIF (Master of International Finance) gráðu í alþjóðlegum fjármálum og bankastarfsemi
3) MS (Master of Science) gráðu í alþjóðlegum viðskiptum
4) MIB (Master of International Business) gráðu í alþjóðlegum viðskiptum
5) MS (Master of Science) gráðu í stjórnun heilbrigðisþjónustu
6) MHA (Master of Health Administration) gráðu í stjórnun heilbrigðisþjónustu
7) MS (Master of Science) gráðu í stjórnun
8) ML (Master of Law) gráðu í lögfræði
9) MA (Master of Arts) gráðu í skattarétti
10)  MTA (Master of Tax Administration) gráðu í skattastjórnun
11) MS (Master of Science) gráðu í viðskiptalögfræði

12) LLM (Master of Laws) gráðu í Evrópurétti
13) MA (Master of Arts) gráðu í Evrópufræðum
14) MA (Master of Arts) gráðu í menningarstjórnun
15) MA (Master of Arts) gráðu í mennta- og menningarstjórnun
16) MA (Master of Arts) gráðu í hagnýtum hagvísindum

17) MA (Master of Arts) gráðu í menningarfræði

Fagráð getur heimilað nemendum að útskrifast með samsettar gráður. Slíkar gráður eru að lágmarki 120 einingar. Einnig má útskrifa nemendur með diplóma í öllum námslínum hafi þeir lokið að minnsta kosti 60 einingum. Skólinn getur skipulagt námslínur sínar einn eða í samstarfi við aðra háskóla.

25. gr.

Nám á Bifröst er að jafnaði skipulagt í þremur önnum, haustönn, vorönn og sumarönn.

Fyrir febrúarlok ár hvert skal dagskrá næsta skólaárs samþykkt í fagráði og birt á vef skólans. Þar skal meðal annars koma fram hvenær annir hefjast, próftímabil og skilafrestir lokaverkefna.

Nemendur í grunnámi skulu vinna að lágmarki þrjú misserisverkefni á námstímanum. Þeir sem stunda skiptinám við erlendan háskóla gera að lágmarki tvö misserisverkefni.

5. KAFLI  -   KENNSLA OG NÁMSMAT

26. gr.

Framkvæmdastjóri kennslu og þjónustu hefur umsjón með allri  kennslu og framkvæmd prófa á vegum skólans og  ber ábyrgð á þjónustu við nemendur og kennara.

27. gr.

Háskólinn heldur skrá yfir námsframvindu hvers nemanda og varðveitir eftir að námi lýkur.

Nemendur skulu skrá sig í námskeið á hverri önn með þeim fyrirvara sem framkvæmdastjóri kennslu og þjónustu  ákveður. Sama gildir um skráningu úr námskeiðum.

Nemendur hafa aðgang að skráningu sinni í námskeið og bera ábyrgð á því að hún sé rétt.

28. gr.

Kennari ræður námsmati á grundvelli reglna um nám og kennslu við Háskólann á Bifröst sem birtar eru í gæðahandbók. Námsmatið endurspeglar þá stefnu skólans að þjálfa nemendur jöfnum höndum í fræðilegum og hagnýtum vinnubrögðum. 

Úrlausn á prófi skal uppfylla lágmarksskilyrði um einkunnina 5, ella verður nemandi að þreyta úrbótarpróf.

Hljóti nemandi lokaeinkunn undir 5 í námskeiði að afloknu úrbótarprófi skal hann eiga þess kost að sitja námskeiðið aftur þegar háskólinn býður upp á það næst. Nemandi skal standast mætingarskyldu og verkefnaskil. Standist nemandi ekki námsgrein þá, með hefðbundnum úrbótarmöguleikum, jafngildir það úrsögn úr skóla.

29. gr.

Nemendum ber í hvívetna að fara að fyrirmælum og reglum um notkun heimilda í ritgerðum og verkefnum. Sé það ekki gert getur nemandi fengið einkunnina 0 fyrir verkefnið og/eða ritgerðina og/eða námskeiðið.

Brjóti nemandi reglur um próftöku eða hafi rangt við skal hann hljóta einkunn 0. 

Brot geta valdið áminningu eða brottrekstri úr skóla, sbr. 35. gr. reglugerðar þessarar.

Ef nemandi mætir ekki til prófs eða gengur úr prófi fær hann 0 í einkunn og verður að standast úrbótarpróf til að ljúka námskeiðinu. Sé um staðfest veikindi að ræða á nemandi rétt á að taka sjúkrapróf og sækir um það til framkvæmdastjóra kennslu og þjónustu.

Nemendur sem búa við fötlun í skilningi 2. gr. laga nr. 59/1992 um málefni fatlaðra eiga rétt á sérúrræðum við próftöku.

Nemendur, sem hafa erlent mál að móðurmáli, eiga rétt á sérúrræðum við próftöku í námskeiðum sem eru kennd á íslensku.

30. gr.

Nemandi á rétt á viðtali við kennara um niðurstöðu sína á skriflegu prófi (prófsýning). Prófsýning fer fram með þeim hætti og á þeim tíma sem framkvæmdastjóri kennslu og þjónustu ákveður. Hana skal kynna nemendum með góðum fyrirvara.

31. gr.

Vilji nemandi, sem ekki hefur staðist próf, ekki una námsmati kennara getur hann kært matið til fagráðs. Kæran skal lögð fram skriflega innan fjögurra virkra daga frá prófsýningu. Nemandi á rétt á slíku endurmati enda sé úrlausn stöðugt í vörslu kennara eða annarra starfsmanna háskólans uns prófdómari tekur við henni. Nemandi sem vill kæra námsmat getur fengið afrit úrlausnar sinnar frá kennara eða úr kennslukerfi. 

Prófdómari skal skila einkunn eins fljótt og unnt er og er hún endanleg.

Í munnlegum prófum skal vera prófdómari viðstaddur ásamt kennara sem sameiginlega ákveða einkunn og er hún endanleg.

32. gr. 

Nú leitast nemandi við að ljúka námi sínu að liðnum reglulegum námstíma og gildir þá hver einstök einkunn hans í fimm ár frá því, en eftir það verður hann að endurtaka sama eða sambærilegt námskeið. Fagráði er þó heimilt að meta eldri próf.

6. KAFLI – GILDISTAKA O.FL.

33. gr.

Háskólaráð setur reglur um réttindi og skyldur nemenda, þar á meðal um málskotsrétt þeirra innan háskólans, að fenginni umsögn nemendafélags skólans. 

34. gr.

Gagnkvæm virðing, kurteisi og heiðarleiki skal ríkja í samskiptum nemenda og starfsfólks háskólans.

Öllum í háskólasamfélaginu ber að standa vörð um heiður skólans. Nemendur og starfsfólk skulu forðast að viðhafa nokkuð í háskólaþorpinu, námi sínu, kennslu eða framkomu innan og utan skólans sem er þeim til vanvirðu eða álitshnekkis eða varpað getur rýrð á nám þeirra, kennslu eða háskólann.

35. gr.

Rektor getur veitt nemanda áminningu eða vikið honum úr skóla um tiltekinn tíma eða að fullu ef hann hefur gerst sekur um brot á lögum eða reglum háskólans.

Til ákvörðunar um brottrekstur þarf samþykkt háskólaráðs þar sem gefa skal nemanda kost á að tjá sig um málið, skriflega til rektors og munnlega á háskólaráðsfundi.
 

36. gr.

Heimilt er að binda háskólann til þátttöku í fyrirtækjum með samþykki stjórnar. Um getur verið að ræða félög eða stofnanir alfarið í eigu háskólans eða að hluta, með takmarkaðri eða ótakmarkaðri ábyrgð, allt eftir ákvörðun stjórnar hverju sinni.

Fjárhagsár skólans er almanaksárið.

38. gr.

Rektor skal í aprílmánuði ár hvert halda opinn ársfund skv. 23. gr. háskólalaga nr. 63/2006 þar sem fjárhagur skólans og meginatriði starfsáætlunar eru kynnt.

Í maímánuði ár hvert skal háskólaráð halda háskólafund skv. 16. gr. háskólalaga nr. 63/2006. 

39. gr. 

Stjórn Háskólans á Bifröst setur reglugerð á grundvelli laga um háskóla og samþykkta skólans. Háskólastjórn getur gert breytingar á reglugerð með einföldum meirihluta atkvæða. Rektor, háskólaráð eða einstakir stjórnarmenn geta lagt tillögu um breytingu á reglugerð fyrir stjórn. 

Reglugerðarbreytingar taka gildi við birtingu þeirra. Rektor skal birta breytingar á vef skólans eigi síðar en viku eftir samþykkt þeirra.

Við gildistöku þessarar reglugerðar eru fyrri reglugerð og áréttingar á grunni hennar felldar úr gildi.